برج المملکہ یا کنگڈم سینٹر سعودی عرب کے دارالحکومت ریاض میں واقع ملک کی بلند ترین عمارت ہے جسے دنیا کی خوبصورت ترین عمارتوں میں سے ایک شمار کیا جاتا ہے۔ 302 میٹر (992 فٹ) بلند یہ عمارت دنیا کی بلند ترین عمارات کی فہرست میں 25 ویں نمبر پر ہے۔ برج 94 ہزار 230 مربع میٹر پر جبکہ کل عمارت 3 لاکھ مربع میٹر پر پھیلی ہوئی ہے۔
برج المملکہ سعودی شہزادے الولید بن طلال بن عبدالعزیز السعود کی ملکیت ہے۔ اس منصوبے پر کل 1.717 ارب سعودی ریال کی لاگت آئی۔ برج کا سنگ بنیاد 1999ء میں رکھا گیا اور 2002ء میں پایہ تکمیل پر پہنچا۔ برج شہر کے مرکز میں شاہراہ شاہ فہد اور کوچہ العروبہ کے درمیان ریاض کے ابھرتے ہوئے کاروباری مرکز اولایا میں واقع ہے۔
برج المملکہ 2002ء میں ایمپورس اسکائی اسکریپر ایوارڈ جیت چکا ہے جس میں اس کے منفرد اور دلکش ڈیزائن کو سراہا گیا۔
عمارت میں دفاتر اور خریداری کے مراکز کے علاوہ ہوٹل اور رہائشی اپارٹمنٹ بھی واقع ہیں۔
اس میں واقع مسجد دنیا کی بلند ترین مسجد بھی واقع ہے جبکہ اس کی ایک اور خصوصیت اس چھت کے دونوں سروں کے درمیان واقع پل ہے جہاں سے پورے ریاض کا دلکش نظارہ دیکھا جاسکتا ہے۔
زمرہ: تعمیرات زمرہ: سعودی عرب
